Jon Fredrik Baksaas

Frå Wikipedia – det frie oppslagsverket
Jon Fredrik Baksaas

Statsborgarskap Noreg
Fødd 21. november 1954 (69 år)
Skien kommune
Yrke gründer
Jon Fredrik Baksaas på Commons

Jon Fredrik Baksaas (fødd 21. november 1954) er ein norsk siviløkonom som sidan juni 2002 har vore konsernsjef i Telenor.

Baksaas er utdanna ved Norges Handelshøyskole og IMD i Lausanne. Etter enda utdanning som siviløkonom (1979), byrja han i industri- og offshoredivisjonen i Det norske Veritas, der han fram til 1985 hadde fleire leiarfunksjonar. I perioden 1985–1988 hadde han leiande stillingar i Stolt Nielsen Seaway AS, og i 1988-1989 var han finansdirektør i Aker AS. Etter det vart han finansdirektør i TBK AS, og var der fram til han i 1994 byrja i Telenor. Baksaas hadde fleire leiarstillingar i konsernet, mellom anna finansdirektør (CFO), før han i 2002 vart konsernsjef.

Under leiing av Baksaas har Telenor vokse sterkt, og er i dag eit globalt teleselskap med verksemd i 12 land. Selskapet søkjer fyrst og fremst fleirtalsposisjon i mobilselskaper med fokus på Europa og Asia. Baksaas var hovudarkitekt bak introduksjonen av Telenor i India, gjennom å kjøpe opp fleirtalsposisjonen i selskapet Unitech Wireless. Dette føretaket har mobillisens for heile India.

Jon Fredrik Baksaas er også styremedlem i den svenske Handelsbanken, og har også hatt andre verv i næringslivet og i NHO. Baksaas har sidan 2009 vore styremedlem i den globale mobilorganisasjonen GSM Association. Han har også fleire andre styreverv utanfor Telenor.

Kritikk[endre | endre wikiteksten]

I 2006 vart Baksaas kontroversiell då han sørgde for at Telenor-dotterselskapet Djuice sponsa dottera hans og russevenninnene hennar med gratis mobiltelefonar og ringjetid. Dette vart avvikla kort tid etter at det vart kjent i media. Ved eit seinare høve kom Baksaas igjen i mediesøkjelyset då han innløyste opsjonar i Telenor til ein verdi av 12 millionar kroner. Som Telenor-sjef vart han også kritisert i desember 2006, denne gongen av fredsprisvinnaren Muhammad Yunus som mellom anna kritiserte Telenor for å ta ut for høg profitt frå investeringa i mobiltelefonselskapet Grameen Phone i heimlandet hans, Bangladesh.

Kjelder[endre | endre wikiteksten]